Moliyaviy «sandbox» ishtirokchilari maʼlumotlar sizib chiqishi haqida Markaziy bankni 24 soatdan kechiktirmay xabardor qilishi shart
Mijozlar maʼlumotlari yoki bank siri jiddiy sizib chiqqan taqdirda, sinovlar besh ish kuni ichida muddatidan oldin toʻxtatilishi kerak
Oʻzbekistonda 20-oktabrda «regulyatorlik sandboxi» ishtirokchilari uchun yangi nizom kuchga kirdi. Bu Markaziy bank nazorati ostida moliyaviy xizmatlar sinovdan oʻtkaziladigan loyihalardir. Kiberhodisalar va shaxsga doir maʼlumotlarning ruxsatsiz oshkor etilishi haqida regulyatorga ular aniqlangan paytdan boshlab 24 soatdan kechiktirmay xabar berish kerak.
Xabardor qilish tartibi va muddati har bir loyihaning vaqtinchalik qoidalarida koʻrsatilishi kerak. Agar jiddiy hodisa mijozlar maʼlumotlari yoki bank sirini tashkil etuvchi maʼlumotlarning oshkor etilishi yoxud yoʻqolishiga olib kelsa, Markaziy bank sinovlarni muddatidan oldin toʻxtatish va kompaniyani ishtirokchi maqomidan mahrum qilish haqida qaror qabul qilishi kerak.
Kompaniyalar mijozlarni xizmat sinov rejimida ekanidan ogohlantirishi va yuzaga kelishi mumkin boʻlgan xatarlarni tushuntirishi shart. Reklamada ham xizmatning eksperimental xususiyati koʻrsatilishi kerak. Bundan tashqari, ishtirokchilar maʼlumotlar maxfiyligini taʼminlashi, mijozlarni kiberfiribgarlik va fishingdan himoya qilish choralarini koʻrishi lozim.
Loyiha toʻxtatilgan taqdirda, tuzilgan shartnomalar boʻyicha majburiyatlar saqlanib qoladi. Mablagʻlarni qaytarish va mijozlarga keyinchalik xizmat koʻrsatish tartibi oldindan belgilanishi kerak. Maxsus rejim yakunlangach, ishtirokchilar toʻplangan shaxsga doir maʼlumotlar hamda bank siri haqidagi maʼlumotlarni oʻchirishi lozim, qonun ularni saqlashni talab qiladigan holatlar bundan mustasno. Yangi nizom 2022-yildan beri amal qilib kelgan tartibni almashtirdi va sinovlarning uchta yoʻnalishini belgiladi: innovatsiyalar, akseleratsiya va texnologik hamkorlik. Maxsus rejimning umumiy muddati uch yildan oshmasligi kerak.
