Toshkentda bogʻchalar va yoʻllarni taʼmirlashga 4 mlrd soʻm sarflanadi
Mablagʻlarning asosiy qismi bogʻchalarni modernizatsiya qilish, mahallalar xavfsizligini taʼminlash va yoʻl ishlariga yoʻnaltiriladi
Mablagʻlarni quyidagicha taqsimlash rejalashtirilgan: - Uchtepa tumanida xavfsizlikni taʼminlash (qariyb 1 mlrd soʻm): mablagʻlar tumandagi 20 ta mahallaga videokuzatuv kameralarini oʻrnatishga yoʻnaltiriladi; - Uchtepa tumanidagi 244-sonli bogʻchani taʼmirlash (991 mln soʻm): bu mablagʻ evaziga binoning tomi taʼmirlanadi, isitish tizimi yangilanadi va muassasa hududidagi piyodalar yoʻlaklariga asfalt yotqiziladi; - Mirzo-Ulugʻbek tumanidagi 418-sonli bogʻchani kapital taʼmirlash (815 mln soʻm): “Buz” mahallasidagi loyiha bolalar uchun sharoitlarni sezilarli darajada yaxshilash imkonini beradi; - Yunusobod tumanidagi yoʻllar (560 mln soʻm): mablagʻlar “Xalqobod” va “Oʻzbekiston Mustaqilligi” mahallalaridagi ichki yoʻllarni asfaltlash va taʼmirlashga ajratilgan; - Yunusobod tumanidagi “Kelajak” markazi (363,6 mln soʻm): mablagʻlar Ahmad Donish koʻchasidagi markaz binosini taʼmirlashga sarflanadi. Bu yerda 150 nafardan ortiq bola boshlangʻich kasbiy tayyorgarlikdan oʻtadi; - Mirobod tumanini koʻkalamzorlashtirish (315,9 mln soʻm): summa obodonlashtirish, yashil oʻsimliklarni muntazam sugʻorish va parvarishlashga yoʻnaltiriladi.
Shu bilan birga, hokimiyat Toshkentdagi toʻrtta mahallada yanada keng koʻlamli oʻzgarishlar kutilayotganini maʼlum qildi: ularda yangi maktablar va bogʻchalar qurish, shuningdek, jamoat makonlarini obodonlashtirishni oʻz ichiga olgan kompleks yangilash ishlari rejalashtirilgan.
