Shakira Bishkekdagi konserti oldidan qirgʻizcha tebetei kiydi
40 mingdan ortiq tomoshabin xonandaning Markaziy Osiyodagi «Bishkek Arena»da boʻlib oʻtgan ilk chiqishiga tashrif buyurdi.
Xonanda Shakira Instagramʼda Bishkekdagi konserti oldidan suratga olingan sahna orti videosini ulashdi. Tengri Life xabariga koʻra, sanʼatkor chiqish arafasidagi tunda samolyotda Qirgʻiziston poytaxtiga yetib kelgan.
Videoda xonanda ingliz tilidagi iboralar yozilgan mato salfetkalarni navbatma-navbat agʻdaradi. Shakiraning boshida anʼanaviy qirgʻiz bosh kiyimi — tebetei bor.
Salfetkalardagi yozuvlar Qirgʻiziston musiqasi, ijodiyoti va mehmondoʻstligiga bagʻishlangan. Ularda shunchaki eshitilmay, his qilinadigan ovozlar, nur ulasha oladigan musiqa hamda sanʼatkor mamlakatga ijrochi sifatida kelgani, bu yerdan esa katta oilaning bir qismi boʻlib ketishi kerakligi haqida soʻz boradi.
Shakiraning konserti yakshanba kuni, 18 oktabrda «Bishkek Arena» stadionida boʻlib oʻtdi. Bu xonandaning Las Mujeres Ya No Lloran World Tour jahon turniri doirasida Markaziy Osiyodagi ilk chiqishi boʻldi.
