Oʻzbekistonda yoshlar oʻyinlar yaratish va robototexnikaga oʻqitiladi
2030-yilgacha raqamli iqtisodiyot segmentlarida yana 500 mingta ish oʻrnini taʼminlash lozim
Oʻzbekiston Prezidenti Shavkat Mirziyoyev raqamli taʼlim ekotizimini rivojlantirishga oid materiallar bilan tanishdi. IT sohasida 300 mingta ish oʻrni yaratish boʻyicha maqsad allaqachon bajarilgan. 2030-yilgacha kunduzgi va masofaviy shakllarda 5,5 million yoshni oʻqitish rejalashtirilmoqda.
Prezident har yili 1 mln yoshni robototexnika, kompyuter oʻyinlarini yaratish, startaplar va boshqa istiqbolli yoʻnalishlarga oʻqitish vazifasini qoʻydi.
Maktab oʻquvchilari uchun «Al-Xorazmiy vorislari» va «Sunʼiy intellektning besh million yetakchisi» loyihalarini kengaytirish, bunda oliy taʼlim muassasalari va xususiy taʼlim markazlari resurslarini birlashtirish rejalashtirilmoqda. Dasturlarga sunʼiy intellekt, mikrochiplarni loyihalash, uchuvchisiz texnologiyalar va kompyuter oʻyinlarini yaratish yoʻnalishlarini qoʻshish taklif etilmoqda. Shuningdek, informatika oʻqituvchilarining malakasini oshirish hamda Fargʻona tajribasini hisobga olgan holda iOS dasturchilarini tayyorlash markazlarini ochish rejalashtirilmoqda.
«Raqamli yoshlar» platformasi taʼlim, koʻnikmalar, tillar va sertifikatlar haqidagi maʼlumotlarni birlashtirib, vakansiyalarni tanlash va ishga joylashishni kuzatish imkonini beradi. Grantlarni raqamli taʼlim, kadrlar tayyorlash va olis hududlarda markazlar tashkil etishga yoʻnaltirish taklif qilindi.
