Ummon tuya goʻzallik tanlovidan 20 tuya chetlatildi
Tekshiruvlarda ayrim tuyalarga botoks, filler va silikon qoʻllangani, mushaklarni koʻrsatish uchun gormonlar ehtimoli oʻrganilayotgani aniqlandi.
Zamin.uz xabariga koʻra, Ummonning Al-Musan shahrida oʻtkazilgan tanlovda 20 ta tuya veterinariya nazoratidan keyin musobaqadan chiqarildi. Hayvonlarning tashqi koʻrinishini sunʼiy oʻzgartirishga urinishlar bunga sabab boʻlgan.
Koʻrfaz mamlakatlaridagi bunday tanlovlarda lab, burun, bosh, boʻyin, oʻrkach va tana tuzilishi baholanadi. Gʻoliblik tuya egasiga katta moliyaviy foyda keltirishi mumkin, ammo kosmetik aralashuvlar infeksiya, yalligʻlanish va toʻqimalar zararlanishiga olib keladi. Botoks hayvonning ovqatlanishi yoki suv ichishiga ham xalaqit berishi ehtimoli bor.
Tashkilotchilar tanlov adolatini taʼminlash uchun veterinariya nazoratini kuchaytirishini bildirdi.
