Umrbod jazo: Senat bolalar himoyasini kuchaytirdi

Oliy Majlis Senati 2-oktabr kuni bolalarni zoʻravonlikning barcha shakllaridan himoya qilishga qaratilgan qonunni maʼqulladi. Hujjat bolalarga qarshi jinsiy jinoyatlar uchun javobgarlikni kuchaytiradi va tergov jarayoniga yangi talablar kiritadi.

14 yoshga toʻlmagan bolaga nisbatan jinsiy jinoyat sodir etganlik uchun 25 yilgacha ozodlikdan mahrum qilish yoki umrbod qamoq jazosi belgilanmoqda. Bolalarning jinsiy daxlsizligiga qarshi oʻta ogʻir jinoyatlar boʻyicha javobgarlikka tortish va hukmni ijro etish muddatining oʻtib ketishi endi hisobga olinmaydi.

Bolaning oʻlimiga sabab boʻlgan qasddan sodir etilgan jinoyatlar uchun shartli hukm chiqarish hamda jazodan muddatidan oldin shartli ozod qilish taqiqlanadi. Bu bunday jinoyatlar boʻyicha jazoni yengillashtirish imkoniyatlarini cheklaydi.

Jinsiy zoʻravonlikdan jabrlangan yoki unga guvoh boʻlgan bolalarga davlat hisobidan malakali yuridik yordam beriladi. Voyaga yetmaganlarni soʻroq qilish videoga olinadi, jabrlanuvchi bilan gumon qilinuvchi yoki ayblanuvchi oʻrtasidagi yuzlashtirish esa maxsus tartibda oʻtkaziladi.

Agar zoʻravonlikni oila aʼzosi yoki yaqin qarindosh sodir etgan boʻlsa, ish jarayonida vasiylik va homiylik organi vakili qatnashishi shart boʻladi. Bolaga zoʻravonlik qilgani uchun javobgarlikka tortilgan taʼlim tashkiloti xodimi ishdan boʻshatilishi va keyinchalik bolalar bilan ishlashiga cheklov qoʻyilishi mumkin.

Qonun ota-onalarning bolaga gʻamxoʻrlik qilmasligi, uning asosiy ehtiyojlarini qasddan qondirmasligi va nikoh yoshi qoidalarini buzishi uchun maʼmuriy javobgarlikni ham kuchaytiradi. Zoʻravonlikdan qoʻrqib murojaat qilishga ikkilanadigan ayollar va bolalar soʻroviga koʻra yashash manziliga javob yuborilmasligi mumkin.