UzPost Wildberries bilan 360 mlrd soʻmgacha foizsiz qarz olish boʻyicha muzokara olib bormoqda
Davlat aktivlarini boshqarish agentligi milliy pochta operatori uchun kredit liniyasi ochish boʻyicha kompaniya bilan dastlabki kelishuvlarga erishilganini maʼlum qildi.
Oʻzbekistonning milliy pochta operatori UzPost Wildberries bilan 360 mlrd soʻmgacha foizsiz qarz olish imkoniyatini muhokama qilmoqda. Mablagʻlar zaruratga qarab foydalanish uchun ajratiladi, biroq umuman sarflanmasligi ham mumkin, dedi Davlat aktivlarini boshqarish agentligi direktori Sohibjon Murodov.
Avvaliga yillik 14 foiz stavkada 100 mlrd soʻm jalb qilish rejalashtirilgan, biroq bu masala ovozga qoʻyilmagan. Qarzdan foydalanish maqsadlari va uni qoplash mexanizmlariga aniqlik kiritilgach, muzokaralar qayta tiklandi.
Wildberries kompaniyasining besh nafar vakili UzPost kuzatuv kengashiga kirdi va unda koʻpchilik oʻrinlarni egalladi. Ularning ishtiroki strategik qarorlar, jumladan, qarz mablagʻlaridan foydalanish samaradorligini baholash bilan cheklanadi. Kompaniyaning operatsion faoliyati davlat nazoratida qoladi.
