Shimoliy Irlandiyadagi egilgan tanali daraxt Buyuk Britaniyada “Yil daraxti” deb topildi
Nyukasldagi 150 yoshli qayragʻoch kasalliklar va kuchli boʻron shamollariga bardosh berib, matonat ramziga aylandi, deb xabar bermoqda Woodland Trust.
“Bendy Tree” (“Egilib turgan daraxt”) deb ataladigan daraxt Buyuk Britaniyada har yili oʻtkaziladigan “Yil daraxti” tanlovida gʻolib boʻldi. Uning tanasi Irlandiya dengizidan esadigan kuchli dengiz shamollari taʼsirida deyarli gorizontal holatda egilgan.
Taxminan 150 yoshli qayragʻoch XIX asr oʻrtalarida Nyukasl sohilidagi koʻcha va yoʻllarni shamoldan himoya qilish uchun ekilgan bir qator daraxtlardan omon qolgan yagona daraxtdir. Qolganlari shaharni qayta qurish ishlari paytida kesib tashlangan.
Woodland Trust vakili Mey Chemesning aytishicha, daraxt mamlakatdagi qayragʻochlarning aksariyatini nobud qilgan Golland qayragʻoch kasalligini boshdan kechirgan va matonat ramziga aylangan. Uning noodatiy shakli daraxt shoxlari ostidagi skameykada dam olayotgan aholi va sayyohlarga soya beradi.
