Oʻzbekiston $5 mln fondli xalqaro startaplar tanlovini boshlaydi
2027-yil aprelidan Oʻzbekistonda har yili $5 mln jamgʻarmaga ega Land of Startups xalqaro startaplar tanlovi oʻtkazila boshlaydi. 25 nafar gʻolib tekshiruvdan soʻng $200 minggacha mablagʻ olishi mumkin.
Vazirlar Mahkamasi 2026-yil 28-oktabrda Land of Startups tanlovini oʻtkazish toʻgʻrisidagi qarorni qabul qildi. Tanlov Oʻzbekistonga xorijiy startaplar va ularning asoschilarini jalb qilish, texnologiyalar transferini tezlashtirish hamda mamlakatni mintaqaviy startaplar markazi sifatida rivojlantirish maqsadida har yili tashkil etiladi.
Tanlov startaplarni qoʻllab-quvvatlashning kompleks ekotizimini yaratish chora-tadbirlarining bir qismiga aylanadi. Ishtirokchilar sunʼiy intellekt, taʼlim, sogʻliqni saqlash va davlat xizmatlari uchun raqamli yechimlar, moliyaviy texnologiyalar, kreativ industriyalar, kompyuter va mobil oʻyinlar ishlab chiqish, shuningdek, biznes va sanoat uchun yechimlar yoʻnalishidagi loyihalarini taqdim etishi mumkin.
25 ta gʻolib jamoaning har biri $200 minggacha investitsiya olishi mumkin. Mablagʻlar loyiha va jamoa kompleks tekshiruvdan oʻtkazilgandan soʻng IT Park direksiyasi huzuridagi venchur fond tomonidan taqdim etiladi.
Qaror IT Park faoliyati qoidalarini ham oʻzgartiradi. Jumladan, rezidentlar tomonidan avtomatlashtirish sohasida ishlab chiqilgan hisobga olish va oʻlchash vositalarini soliq organlarining axborot tizimlari bilan majburiy integratsiya qilish talabi bekor qilinadi.
IT Park rezidentlari uchun ruxsat etilgan yoʻnalishlar roʻyxati kengaytiriladi. Unga buyumlar interneti va sunʼiy intellekt qurilmalarini, mikro- va nanoelektronikani, intellektual robotlarni ishlab chiqarish hamda sotish, shuningdek, biznes farishtalari klublari faoliyati kiradi.
