Toshkentda suzish boʻyicha Jahon kubogi bosqichi oʻtkaziladi
Poytaxtda 8–10-oktabr kunlari ilk bor Jahon kubogi bosqichi boʻlib oʻtadi. Unda 40 mamlakatdan 230 nafar sportchi, jumladan jahon va Olimpiya oʻyinlari chempionlari ishtirok etadi.
Musobaqada taniqli suzuvchilar, jumladan avstraliyalik Kameron Makevoy, gonkonglik Shivon Hogi, xitoylik Yuy Itin hamda rossiyalik Yevgeniya Chikunova va Yuliya Yefimova qatnashadi. Ishtirokchilar safida Olimpiya oʻyinlari chempionlari va sovrindorlari, jahon birinchiliklari gʻoliblari hamda amaldagi jahon rekordchilari bor.
Oʻzbekiston Milliy olimpiya qoʻmitasi maʼlumotiga koʻra, mamlakat sharafini 51 nafar sportchi himoya qiladi. Jamoa tarkibiga, xususan, Eldor Usmonov, Ilya Sibirsev, Xurshidjon Tursunov va Anastasiya Zelinskaya kiritilgan.
Bellashuvlar Olimpiya shaharchasidagi Suv sporti saroyida boʻlib oʻtadi.