Porsche rahbari kompaniyani saqlab qolish uchun boshqaruv xodimlarining 40 foizini qisqartirmoqchi
Kompaniya eng qimmat avtomobillarining oʻrtacha narxini €330 000 gacha oshiradi va ichki yonuv dvigatelli avtomobillar ishlab chiqarishni saqlab qoladi, deb xabar bermoqda Frankfurter Allgemeine Zeitung.
Porsche bosh direktori Mixael Lyayters boshqaruv lavozimlarining 40 foizi va ishlab chiqarishdagi xodimlarning 25 foizi qisqartirilishini eʼlon qildi. Umuman olganda, taxminan 9000 nafar xodim ishdan boʻshatiladi. Bu ish haqi xarajatlarini 10 foizga kamaytirish imkonini beradi.
Lyayters, shuningdek, top-menejerlar uchun individual bonuslar ulushi 10 foizdan 30 foizgacha oshirilishini maʼlum qildi. Kompaniya savdolarda qimmat avtomobillar ulushini uchdan bir qismdan deyarli yarmigacha oshirishni rejalashtirmoqda. 2030 yilgacha Porscheʼning eng qimmat 10 000 ta avtomobilining oʻrtacha narxi €270 000 dan €330 000 gacha koʻtarilishi kerak.
Porsche ichki yonuv dvigatelli avtomobillarni ishlab chiqishdan voz kechmaydi va elektr boʻlmagan uchta yangi modelni chiqarishni rejalashtirmoqda. Bunday avtomobillarning savdodagi ulushi taxminan 67 foizni tashkil etadi.
