Oʻzbekiston va IHTT soliq axboroti almashinuvini muhokama qildi
Uchrashuvda kriptoaktivlar, moliyaviy hisoblar va soliq masalalarida avtomatik axborot almashinuvini joriy etish rejalari koʻrib chiqildi.
Soliq qoʻmitasi maʼlumotiga koʻra, Oʻzbekiston delegatsiyasi IHTTning Soliq maqsadlarida shaffoflik va axborot almashinuvi boʻyicha Global forumi kotibiyati bilan uchrashdi. Tomonlar Oʻzbekistonning CARF boʻyicha baholash natijalari va ushbu tizim uchun muhim yurisdiksiyalarni aniqlash jarayonini muhokama qildi.
CARF kriptoaktivlar bilan bogʻliq hisobotlarni almashish tizimi hisoblanadi. Shuningdek, soliq masalalarida oʻzaro maʼmuriy yordam toʻgʻrisidagi MAC konvensiyasini qoʻllashni tezlashtirish hamda moliyaviy hisoblar haqidagi maʼlumotlarni avtomatik almashish imkonini beruvchi CRS standartini joriy etishga tayyorgarlik koʻrish masalalari koʻrib chiqildi.
Tomonlar qoʻshimcha maʼlumot taqdim etish, zarur tayyorgarlik ishlarini davom ettirish va xalqaro avtomatik axborot almashinuvi mexanizmlarini joriy etish boʻyicha hamkorlikni davom ettirishga kelishib oldi.
