Xitoyda ikki robot dangasaligi va ish joyidan chiqib ketgani uchun «ishdan boʻshatildi»
AgiBot kompaniyasi Shanxaydagi doʻkonda G2 rusumidagi oltita odamga oʻxshash robotni sinovdan oʻtkazdi.
Androidlar 24 soat davomida ishladi: tashrif buyuruvchilarni kutib oldi, mahsulotlarni tarqatdi, qahva tayyorladi, javonlarni tekshirdi va xonani tozaladi. 24 soat ichida ular 1730 ta topshiriqni bajardi.
Ulardan faqat toʻrt nafari shartli ravishda doimiy xodim maqomini oldi. Bir robot javonlarni toʻldirish vazifasini uddalay olmadi: tashkilotchilar uni yetarlicha faol emas, deb baholadi. Tozalash uchun masʼul boʻlgan ikkinchi robot esa toʻlib ketgan axlat qutisiga duch kelib, belgilangan yoʻnalishdan chiqdi va doʻkondan tashqariga chiqib ketdi.
Sinovni jonli efirda 2 mln nafardan ortiq kishi kuzatdi. Ishlab chiquvchilar «ishdan boʻshatilgan» ikki robotning dasturiy taʼminotini takomillashtirmoqchi. Tajriba robotlarga nostandart vaziyatlarda hali ham mustaqil harakat qilish qiyinligini koʻrsatdi.
