Yaponiya banki sunʼiy intellekt tufayli foiz stavkalari yuqori saqlanishidan ogohlantirdi
Yangi texnologiyalar talab va investitsiyalarni oshirib, markaziy banklarni kredit foizlarini tushirmaslikka majbur qilishi mumkin, deb xabar berdi Yaponiya banki.
Tokioda soʻzlagan nutqida regulyator rahbari oʻrinbosari Sinichi Uchida yangi texnologiyalar iqtisodiyotga kuchli turtki berayotganini taʼkidladi. Uning soʻzlariga koʻra, sunʼiy intellekt mahsuldorlikni oshirishi bilan birga bozor talabi va investitsiyalar hajmini ham kengaytirmoqda. Bu jarayon neytral foiz stavkasini, yaʼni iqtisodiy faollikni na ragʻbatlantiradigan va na pasaytiradigan muvozanat darajasini koʻtarishi kutilmoqda. Shu sababli moliya tizimi narxlar oʻsishini jilovlash maqsadida yuqori stavkalarni saqlab qolishi mumkin.
Mazkur oʻzgarishlar uzoq yillar davomida deflyatsiya va oʻta past stavkalar sharoitida yashagan Yaponiya bozori uchun jiddiy ahamiyatga ega. Dushanba kuni mamlakatning 10 yillik davlat obligatsiyalari daromadliligi 3,09 foizga yetib, oʻttiz yillik eng yuqori koʻrsatkichga yaqinlashdi, 30 yillik qogʻozlar esa 4,235 foizlik rekord qayd etdi.
Bozordagi bu oʻsish yaponiyalik sarmoyadorlarning xorijiy aktivlarga, xususan AQSh davlat qimmatli qogʻozlariga boʻlgan talabini susaytirishi mumkin. ING tahlilchilarining maʼlum qilishicha, uzoq muddatli obligatsiyalar daromadliligi oshishining taxminan beshdan bir qismi maʼlumotlar markazlarini moliyalashtirish uchun olingan qarzlar hisobiga toʻgʻri kelmoqda.