Qoraqalpogʻistonda IT universiteti va startaplar texnoparki tashkil etiladi
Tashrif doirasida hudud iqtisodiyotini raqamlashtirish, yangi ish oʻrinlari yaratish va yoshlarni IT kasblariga oʻqitish vazifalari belgilandi.
Gov.uz xabariga koʻra, Prezident tashrifi doirasida Qoraqalpogʻistonda umumiy qiymati 7,6 milliard AQSh dollariga teng loyihalarni ishga tushirish va yangi quvvatlar qurilishini boshlash belgilandi. Bu hududda investitsiya va ishlab chiqarish kengayib, aholi uchun yangi bandlik imkoniyatlari paydo boʻlishini anglatadi.
Yoshlar ijtimoiy-iqtisodiy markazida IT universiteti va startaplar uchun texnopark ochish rejalashtirilgan. Shuningdek, Qoraqalpogʻistonda qiymati 1 million dollarlik 10 ta startapni amalga oshirish, buning uchun Ilm-fan va innovatsiyalar jamgʻarmasidan har yili 30 milliard soʻm ajratish koʻzda tutilmoqda.
2026 yil yakunigacha hududdagi xorijiy investitsiyalar hajmini 2,5 milliard dollarga yetkazish topshirigʻi berilgan. Qoraqalpogʻistonda yangi IT loyihalari va kompaniyalari, shuningdek, qoʻshimcha ish oʻrinlari tashkil etilayotgani qayd etildi.
