Toshkentning Yunusobod tumanida gaz bir kunga oʻchiriladi
«Hududgaz Poytaxt» filiali yuqori bosimli gaz quvurini koʻchirish ishlari olib borilishini maʼlum qildi. Shu sababli tumanning bir qismi gazsiz qoladi.
12 oktabr kuni poytaxtning Yunusobod tumanidagi ayrim aholi vaqtincha gaz taʼminotisiz qoladi. «Posira» mahallasida diametri 325 mm boʻlgan yerosti gaz quvurini koʻchirish ishlari sabab cheklovlar soat 10:00 dan 18:00 gacha amal qiladi.
«Obod» mahallasidagi 150 ta xususiy uy va «Posira» mahallasidagi Mikrorayon koʻchasida joylashgan 515 ta xonadonga gaz berish toʻxtatiladi.
Turar joylardan tashqari, EDEM, Dream Gaz va TRIUMPH ORIENTIR zapravkalarida ham gaz taʼminoti vaqtincha toʻxtatiladi. Ushbu mahallalardagi bolalar uyi va 35 ta ulgurji savdo korxonasi ham oʻchirishdan taʼsirlanadi.
Texnik ishlar yakunlanganidan soʻng gaz taʼminotini bosqichma-bosqich tiklash rejalashtirilmoqda.
