Samarqand viloyatida chiqindi poligonlari atrofidagi hududlar koʻkalamzorlashtirilmoqda
Mintaqada ekologik holatni yaxshilash va yashil hududlarni kengaytirish maqsadida 11 ta poligon atrofidagi yerlarga mevali hamda manzarali daraxtlar ekilmoqda.
Viloyat ekologiya boshqarmasi markaziy chiqindi poligonlari atrofidagi hududlarni koʻkalamzorlashtirish ishlarini olib bormoqda. Samarqand viloyatida jami 11 ta shunday obyekt mavjud.
Ushbu yerlarga mevali va manzarali daraxt koʻchatlari oʻtqazilmoqda, ularning holatini esa masʼul xodimlar nazorat qilib bormoqda. Oʻsimliklarni sugʻorish va ularni parvarishlashga alohida eʼtibor qaratilmoqda. Payariq tumanida esa yangi koʻchatlar ekish uchun yer maydoni allaqachon tayyorlab qoʻyildi.
Ushbu chora-tadbirlardan koʻzlangan maqsad poligonlarning atrof-muhitga salbiy taʼsirini kamaytirish, hududlarni obodonlashtirish hamda yashil maydonlar koʻlamini oshirishdan iborat.
