Angliya bankining sobiq iqtisodchisi Britaniya budjeti oldidan xatarlardan ogohlantirdi
Endi Xoldeyn CNBC telekanaliga bergan intervyusida obligatsiyalar bozoridagi inqirozning oldini olish uchun Endi Bernem hukumati davlat xarajatlarini qisqartirishi shartligini bildirdi.
Angliya bankining sobiq bosh iqtisodchisi Endi Xoldeyn 28-oktabrda taqdim etiladigan kuzgi budjet oldidan Buyuk Britaniyaning moliyaviy holatini «juda qaltis» deb baholadi. Uning aytishicha, agar davlat xarajatlari qisqartirilmasa, bosh vazir Endi Bernem obligatsiyalar bozoriga «qaram» boʻlib qolaveradi. Holbuki, Britaniya davlat obligatsiyalari (giltlar) boʻyicha daromadlilik ayni paytda «Katta yettilik» davlatlari ichida eng yuqori darajada turibdi.
Xoldeyn yuqori inflatsiya, past iqtisodiy oʻsish va budjetning surunkali taqchilligi tufayli Britaniya ayniqsa zaif ekanini taʼkidladi. U pensiyalarning «uch tomonlama blokirovkasi» mexanizmini bekor qilishni qoʻllab-quvvatladi, biroq bozorlar hukumatdan ijtimoiy toʻlovlar xarajatlarini qisqartirish boʻyicha aniq qadamlar kutayotganidan ogohlantirdi. Moliya vaziri Jon Xili ehtimoliy inqirozlar uchun «moliyaviy bufer» yaratish rejalari borligini maʼlum qilgan boʻlsa-da, bu aynan nima hisobidan qilinishini ochiqlamagan.
Matbuotda soliqlarning, xususan banklar uchun oshirilishi mumkinligi muhokama qilinmoqda. Biroq Xoldeyn biznesga ortiqcha yuk tushirmaslikka chaqirdi: uning soʻzlariga koʻra, xususiy sektor soliq yukini hozirdanoq haddan tashqari ogʻir deb hisoblamoqda, uning yana oshirilishi esa iqtisodiy oʻsishni sekinlashtirishi mumkin.
