Pentagon Anthropic sunʼiy intellekt vositalaridan foydalanishni toʻxtatdi
Claude maxfiy maʼlumotlar bilan ishlaydigan tizimlarga chuqur singdirilgani uni tezda almashtirishni qiyinlashtirdi, deb xabar beradi BBC.

AQSh Mudofaa vazirligi Anthropicʼning sunʼiy intellekt vositalari, jumladan Claudeʼdan foydalanishni toʻxtatdi. Idora Google, xAI va OpenAI bilan shartnomalar tuzgan, OpenAI vositalari esa soʻnggi oylarda vazirlikning ayrim boʻlinmalarida faolroq ishlatilgan.
Qaror vazirlik Claudeʼning ayrim himoya cheklovlarini olib tashlash va sunʼiy intellekt vositalariga kengroq kirish huquqini berishni talab qilganidan keyin yuzaga keldi. Anthropic ommaviy kuzatuv va avtonom qurollardan foydalanish xavfini aytib, bunga rozi boʻlmadi. Shundan soʻng mudofaa vaziri Pit Xegset kompaniyani milliy xavfsizlik taʼminot zanjiri uchun xavf deb eʼlon qildi. Kompaniya esa qarorni noqonuniy deb atab, Donald Tramp maʼmuriyatiga qarshi daʼvo kiritdi.
Claude ishlatilgan asosiy tizimlardan biri Palantir boshqaradigan Maven Smart System platformasi boʻlgan. Pentagon undan razvedka maʼlumotlari, sunʼiy yoʻldosh suratlari va dron videolarini qayta ishlashda foydalangan; bu maʼlumotlar ehtimoliy harbiy nishonlarni aniqlash uchun til modellariga uzatilgan.




