Astanada sunʼiy intellekt vositasida yaratilgan filmlar xalqaro festivali boshlandi
Mazkur tanlovga dunyoning 125 mamlakatidan 8 mingdan ziyod ijodiy ish kelib tushdi, deb xabar berdi Oqoʻrda.
Qozogʻiston rahbari Qosim-Jomart Toqayev tadbir ochilishida soʻzga chiqib, loyihaning oʻziga xosligini va yangi texnologiyalarning ahamiyatini qayd etdi. Uning taʼkidlashicha, zamonaviy dasturlar tufayli ijodiy guruhlar endi yirik studiyalar va homiylarga qaram boʻlmay, mustaqil ravishda sifatli kino mahsulotlarini yaratish imkoniyatiga ega boʻlmoqda.
Toqayev raqamli sohadagi jarayonlarni toʻxtatib boʻlmasligini aytib, xavfsizlik masalalarini birinchi oʻringa qoʻyish zarurligini bildirdi. U insoniyat tarixidagi olov va yadro energetikasi misolini keltirgan holda, algoritmlardan masʼuliyat bilan foydalanish boʻyicha umumiy tartib-qoidalarni ishlab chiqish kelajak avlod uchun muhim ekanini eslatdi.
Kinoanjumanga AQSH, Xitoy, Hindiston, Janubiy Koreya, Buyuk Britaniya, Indoneziya, Yaponiya, Braziliya va Fransiya kabi davlatlardan ijodkorlar oʻz ishlarini yuborgan. Toqayev oʻrtacha yoshi 33 yoshni tashkil etuvchi Qozogʻiston xalqi doimo ilgʻor gʻoyalarga intilishini aytib, nufuzli soha mutaxassislari ishtirokida oʻtadigan ushbu tadbir oʻzaro tajriba almashish maydoniga aylanishiga ishonch bildirdi.
Marosimda festival asoschisi Almas Jali, Freedom Holding Corp bosh direktori Timur Turlov, Network School asoschisi Balaji Shrinivasan, tanlov ishtirokchisi Jamin Tasker hamda hakamlar hayʼati raisi Odri Azule ham ishtirok etdi.