Steam ishlab chiquvchilarni AI klonlaridan himoya qilmasligini bildirdi
7,2 mingdan ortiq demo oktyabr oyidagi «Oʻyinlar boʻlsin» festivalida ishtirok etdi, ularning 36 foizi AI yordamida yaratilgan.
Valve ishlab chiquvchilarning sunʼiy intellekt vositalaridan foydalanishini cheklashni rejalashtirmayapti. Bu haqda Steam vakillari Tom Jardino va Mark Uilkinson Janubiy Koreyada oʻtkazilgan Steam Indie Connect konferensiyasida maʼlum qildi.
Jardinoning fikricha, klonlar AI paydo boʻlishidan oldin ham mavjud boʻlgan, biroq hozir nusxalar yaratish tezlashdi. Uning aytishicha, ishlab chiquvchilar oʻz loyihalarini oson takrorlanadigan bitta mexanika bilan emas, balki funksiyalar, oʻziga xos xarakter va original gʻoyalar uygʻunligi bilan himoya qilishi kerak.
Uilkinson festivalda tavsiyalar algoritmi demolarni tasodifiy tartibda koʻrsatganini tan oldi. Shu sababli foydalanuvchilar sifati past loyihalarni koʻproq koʻrgan, Valve esa bu muammoga yechim izlamoqda.
