Air Arabia Samarqand, Buxoro va Xivaga toʻgʻridan-toʻgʻri reyslarni yoʻlga qoʻyishni muhokama qilmoqda
Turizm qoʻmitasi va aviakompaniya Oʻzbekistondagi yoʻnalishlar tarmogʻini kengaytirish hamda xorijda turistik yoʻnalishlarni targʻib qilish masalasini koʻrib chiqmoqda.
Turizm qoʻmitasi va Air Arabia aviakompaniyasi Samarqand, Buxoro, Xiva hamda boshqa turistik shaharlarga toʻgʻridan-toʻgʻri reyslarni yoʻlga qoʻyish imkoniyatini muhokama qildi. Ayni paytda tashuvchi Toshkentdan Abu-Dabi va Sharjaga haftasiga 13 ta reysni amalga oshiradi, shuningdek, Namanganga ham parvoz qiladi.
Tomonlar Birlashgan Arab Amirliklariga parvozlar chastotasini oshirish, maxsus turistik paketlar yaratish va Air Arabiaʼning raqamli platformalarida Oʻzbekistonni targʻib qilish masalalarini muhokama qildi. Yevropa, Yaqin Sharq va Osiyodan tranzit sayyohlarni jalb etish, shuningdek, ziyoratchilar uchun «Umra plus» loyihasini rivojlantirishga alohida eʼtibor qaratildi.
Air Arabia samolyotlar bortida mamlakatning turistik salohiyati haqidagi axborot materiallarini joylashtirishni qoʻllab-quvvatlaydi.
