Oʻzbekistonda Yaponiya biznesi ishtirokida sanoat parki tashkil etilishi mumkin
Tokioda Yaponiyaning Sumitomo Corporation kompaniyasi va oʻzbekistonlik diplomatlar ishtirokida muzokaralar boʻlib oʻtdi, deb xabar bermoqda «Dunyo» AA.
Oʻzbekiston diplomatlari va Yaponiyaning Sumitomo Corporation kompaniyasi vakillari oʻrtasida muzokaralar boʻlib oʻtdi. Oʻzbekiston tomoni energiya samaradorligini oshirish hamda qayta tiklanuvchi energiya manbalarini rivojlantirish sohasidagi islohotlarni taqdim etdi.
Tomonlar yetakchi ishlab chiqaruvchilar uchun qoʻshma sanoat parki tashkil etish imkoniyatini muhokama qildi. Loyiha qoʻshimcha yapon investitsiyalarini jalb etishi va sanoat sohasidagi hamkorlikni mustahkamlashi kutilmoqda. Sumitomo Corporation infratuzilma, energetika va shaharlarni rivojlantirish sohalarida faoliyat yuritadi.
Uchrashuv yakunida amaldagi loyihalar boʻyicha ishlar jadvali kelishib olindi hamda hamkorlikning yangi yoʻnalishlarini ishlab chiqish masalasi belgilandi.
