JSTga qoʻshilish doirasida IMEI uchun toʻlovni bekor qilish masalasi hali koʻtarilmadi — UzIMEI
UzIMEI Oʻzbekistonning JSTga qoʻshilishi munosabati bilan IMEIʼni roʻyxatdan oʻtkazish uchun toʻlovni bekor qilish masalasini koʻrib chiqmayapti. Hozirda yigʻim 88 ming soʻmni tashkil etadi.

UzIMEI tizimi operatori Oʻzbekistonning Jahon savdo tashkilotiga qoʻshilishi doirasida IMEI-kodlarini roʻyxatdan oʻtkazish uchun toʻlovni bekor qilish yoki kamaytirish masalasini muhokama qilmayapti. Bu haqda 11 noyabr kuni Telekommunikatsiya tarmoqlarini boshqarish markazi boʻlim boshligʻi Otabek Azimov maʼlum qildi.
UzIMEI va Bojxona qoʻmitasining matbuot anjumanida amaldordan bir dona kod uchun toʻlov 88 ming soʻmdan 30–40 ming soʻmgacha kamayishi mumkinmi, deb soʻrashdi. Azimovning aytishicha, JST talablari IMEI uchun toʻlovlarga taalluqli emas: muzokaralar bojxona sohasidan boshlangan, telefonlarni roʻyxatdan oʻtkazish masalasi esa ularda koʻtarilmagan.
Yanvardan sentyabrgacha mamlakatda 7,34 mln IMEI-kodi roʻyxatdan oʻtkazildi. Roʻyxatdan oʻtkazishlarning katta qismini importchilar amalga oshirdi, kichikroq ulush esa rezidentlar va norezidentlarga toʻgʻri keldi.
Roʻyxatdan oʻtkazishlarning eng koʻpi sentyabr oyiga toʻgʻri keldi — 1,03 mln. Mart oyida bu koʻrsatkich eng past boʻlib, 550 mingta roʻyxatdan oʻtkazishni tashkil etdi.




