Markaziy Osiyo mamlakatlari uchta yangi qoʻshma loyihani kelishib oldi
Bishkekda Markaziy Osiyo iqtisodiyotlari uchun BMTning Maxsus dasturi (SPECA) ishtirokchilari transport, savdo va suv resurslarini boshqarish sohalaridagi hamkorlikni kengaytirishga kelishib oldi.
Uchrashuv yakunlari boʻyicha Bishkek deklaratsiyasi qabul qilindi va uchta loyiha maʼqullandi, deb xabar beradi Avesta.tj.
Birinchi loyiha toʻgʻonlar xavfsizligini oshirishga qaratilgan. Ikkinchi loyiha transport koridorlarini, jumladan, Transkaspiy yoʻnalishini rivojlantirish hamda turli transport turlaridan foydalangan holda tashuvlarni yaxshilashni nazarda tutadi.
Uchinchi loyiha «yashil» iqtisodiyotga bagʻishlangan boʻlib, savdoni soddalashtirish, qishloq xoʻjaligini qoʻllab-quvvatlash va kichik hamda oʻrta biznesning raqobatbardoshligini oshirishni koʻzda tutadi.
Moliyalashtirishni Ozarbayjon, Qirgʻiziston va Oʻzbekiston badallari hisobidan SPECAning maxsus jamgʻarmasi taʼminlaydi. Hozir jamgʻarma jami oltita loyihani qoʻllab-quvvatlamoqda.
2027-yilda dasturga raislik Oʻzbekistonga oʻtadi.




