Xitoyda qayta foydalaniladigan kosmik apparatni sinovdan oʻtkazish rejalashtirilmoqda
Xitoyning CAS Space aerokosmik kompaniyasi Lihong 2 qayta foydalaniladigan apparatining ilk parvozini 2027-yilning birinchi choragida amalga oshirishni rejalashtirmoqda.
Sinov apparat taxminan 100 km balandlikdan qaytib, xavfsiz qoʻna oladimi yoki yoʻqmi, shuni koʻrsatishi kerak, deb xabar beradi China Daily.
CAS Spaceʼning Frontier Labs boʻlinmasi ijrochi vitse-prezidenti Wang Yingchengning soʻzlariga koʻra, apparatni loyihalash ishlari yakunlangan, prototipning yer usti sinovlari esa muvaffaqiyatli oʻtmoqda.
CAS Space Lihong 2 apparatini Xitoy Fanlar akademiyasi koʻmagida mustaqil ravishda ishlab chiqmoqda. Uzunligi taxminan 18 metr, diametri 3,35 metr boʻlgan apparat raketa-tashuvchi va foydali yuk modulidan iborat. Uning uchirishdagi massasi qariyb 60 tonnani tashkil etadi.
