Toshkent metrosida poyezdlarni qish mavsumiga tayyorlash boshlandi
Sovuq kunlarda yoʻlovchilar xavfsizligini taʼminlash maqsadida mutaxassislar tarkiblarning texnik holatini tekshirmoqda, deya xabar beriladi Toshkent metropolitenining Telegram-kanalida.
Mutaxassislar poyezdlarni rejali texnik koʻrikdan oʻtkazishga allaqachon kirishgan. Tekshiruvlar jarayonida harakat xavfsizligiga taʼsir koʻrsatuvchi mexanizmlar, uskunalar va asosiy uzellarning holati baholanmoqda.
Ayrim qismlar tarkiblardan yechib olinib, standartlarga muvofiqligi laboratoriyada sinovdan oʻtkazilmoqda. Vagonlar tozaligiga ham alohida eʼtibor qaratilmoqda: sanitariya talablariga rioya etish uchun derazalar, eshiklar va salonlar yuvilmoqda. Mazkur ishlar nosozliklarning oldini olish hamda qishki davrda transportning ishonchliligini oshirishga qaratilgan.
