Londonda musiqani litsenziyalashdagi irqiy kamsitish yiliga £141 mln turadi
Black Lives in Music hisobotida ilk bor qora tanli va janubiy osiyolik ijrochilar konsertlari koʻproq bekor qilinishi, afrobeats va hip-hop kabi janrlar esa «xavfli» deb baholanishi tasdiqlandi, deb yozadi Billboard.
REMEL tadqiqoti Londonda litsenziyalash va politsiya nazorati qora tanli hamda janubiy osiyolik musiqachilar, promouterlar va konsert maydonlari egalarining faoliyatini adolatsiz tarzda cheklashini koʻrsatdi. Shu sababli shahar jonli konsertlardan yiliga £127 mln dan £141 mln gacha daromad yoʻqotadi.
Hisobot ikki yillik maʼlumotlarga — soʻrovnomalar, intervyular, axborot erkinligi toʻgʻrisidagi qonun asosidagi soʻrovlar va hokimiyat qarorlari tahliliga — asoslangan. Unda qora tanli va janubiy osiyolik ijrochilar qatnashadigan tadbirlar koʻproq bekor qilinishi, ularga litsenziya berish rad etilishi yoki shartlar qatʼiylashtirilishi tasdiqlangan. Afrobeats, hip-hop, drill, R&B va dancehall janrlari xavfli ekaniga dalil boʻlmasa-da, avtomatik ravishda «yuqori xavfli» deb hisoblanadi.
Mualliflar tizimni isloh qilish uchun stereotiplardan voz kechish va baholashning shaffof mezonlarini ham oʻz ichiga olgan 19 ta tavsiyani ilgari surmoqda. Hozir promouterlar rad javoblari ustidan shikoyat qila olmaydi, politsiya esa tekshiruvlar uchun hatto internetdagi tasodifiy maʼlumotlardan ham foydalanadi. Muhojirlar soni koʻp boʻlgan hududlarda tadbirlar oʻtkazish uchun vaqtinchalik ruxsatnomalar koʻproq rad etiladi.
